छत्तीसगढ़िया सबले बढ़िया !

छत्तीसगढ़िया सबले बढ़िया , 

                               दुनियां ला ये देखना हे ।
आधा पेट खा के रे संगी,

                                 जांगर टोर कमाना हे ।









१, सोना-चाँदी, हिरा-मोती,

                                    इंहां के धुर्रा मटी हे ।
तभो ले सोसित दलित गरीबहा,

                                छत्तीसगढ़ के वासी हे ।
रतिहा पहागे अब तो संगी .

                                नवा बिहनिया लाना हे ।

आधा पेट .....................


२, खेत हमर कागद हे अऊ,

                                कलम हमर बर नांगर हे।

हरियर-हरियर धान हमर,

                             करम के उज्जर आखर हे ।

कौनो रहय अब अनपढ़ झन,

                                  पढ़ना अऊ पढ़ाना हे ।


आधा पेट ..........................



३ , जगे जगे रहिना हे संगी,

                             करना हे देश के रखवारी।

रखवार बन के करते वो मन,

                                    अब घर घर म चोरी ।

बेच दिही लालच में आ के,

                                    इंकर का ठिकाना हे।

घर माँ लुकाये चोर मन ले ,

                         मोर छत्तीसगढ़ ला बचाना हे।